ROJEVA 18'Ê ÇILEYA 2024'AN
- rojane
- 09:00 18/1
22 kesên li Amedê di 16’ê çileyê de di serdegirtina malan de hatibûn binçavkirin, piştî îfadeyên wan li miduriyeta polîsan hatin wergirtin, hatin berdan.
Gora endamê YPS’ê Sertan Tîken ê di dema qedexeyên derketina derve de jiyana xwe ji dest dabû, hate texrîbkirin û kevirê gora wî jî desteserkirin.
Girtiyê nexweş Abdullah Varişlî jiyana xwe ji dest da.
Li Geverê di tûra duyem a pêşhilbijartinan de Şoreş Dîrî û Şadiye Kirmizigul wekî namzetên DEM Partiyê yên Şaredariya Geverê hatin hilbijartin.
Der barê polîs Mehmet Nûrbakî Goçmez de yê li Cizîrê Nîhat Kazanhan qetil kiribû, biryara lêgerînê ya bi bultena sor hat dayîn.
DEM Partiyê der barê qeydkirina hilbijêrên ji derveyî bajêr serî li YSK’yê da. Piştî îtîrazê daxuyanî hat dayin. Parlamentera bajêr Newroz Ûysal diyar kir ku bi hezaran hilbijêrên xeyalî hene û got: "Bi neheqî, bêhiqûqî, dizî, derew û hîleyê hûn nikarin îradeya vî gelî teslîm bigirin. We serî li qeyûman dan bi ser neket û hûnê bi vekişandina dengan jî bi ser nekevin.”
Di Nobeta Edaletê yên li gelek bajaran didomin de peyamên domandina têkoşînê hatin dayîn. Hevberdevkê HDK’ê Cengîz Çîçek got ku ew piştgiriyê didin çalakiyê û wiha bang kir: “Divê hemû kes xwedî li çalakiyê derkeve.”
Di çarçoveya rapora ATK’ê ya di rapora xwe ya ewil de leza wesayîta zirxî tespît nekir û di rapora duyemîn de jî ku li ser îtîrazê hate amadekirin îdia kir ku bi awayekî teknîkî ne pêkane leza wesayîtê were tespîtkirin, derbarê polîs Metîn Kîraz de yê bû sedemê mirina Mîraç Mîroglû (7) biryara beraetê hate dayîn. Li gorî parêzerên malbatê heke dîmenên bûyerê ji aliyê kesên pispor ve were lêkolînkirin dê tespîta lezê bi hêsanî bê kirin.
Ji duh ve li Hatayê baraneke zêde dibare û kon û konteynirên ku mexdûrên erdhejê tê de dijîn di bin avê de man.
Dema binçavkirinê ya 21 kesên li Stenbolê di encama serdegirtinên malan de hatibûn binçavkirin hate dirêjkirin.
HSK’ê ji bo bijartina 4 endamên Dadgeha Bilind hilbijartin li dar xist. Serdozgerê Komarê ya Anadoluyê yê Stenbolê Îsmaîl Uçar ku bi îdianameya têkildarî “bertîl, şopandina kar û bêusûliyan” bûbû rojev weke endamê Dadgeha Bilind hate hilbijartin.
Bavê Mîraç Mîroglû bertek nîşanî beraat kirina polîsê ku lawê wî qetil kir da û got: "Heke min an jî welatiyekî li polîsekî xistibûya dê cezayê muebedê li me hatibûya birîn.”
Rêxistinên pîşeyî yên çapemeniyê ji bo danişîna Hevseroka DFG’ê Dîcle Muftuoglû ku dê sibe bê lidarxistin banga tevlibûnê kirin.
MYK’a DEM Partiyê dê îro saet di 11.00’an de bi rojevên girîng bicive. Di civînê de dê geşedanên li Rojhilata Navîn, rewşa şer, encamên pêşhilbijartinê û namzetên dê li bajarên rojava bên nîşandan bên nîqaşkirin.