RIHA - Di daxuyaniya li Rihayê ya ji bo rojnameger Cîhan Bîlgîn û Nazîm Daştan ên hatin qetilkirin de hat diyarkirin ku rojnameger her tim bûne dengê heqîqetê û wiha hat gotin: “Heta kêliyên xwe yên dawî bûn dengê Rojava. Em ê kamera û pênûsên wan li erdê nehêlin, çi dibe bila bibe."

 

Tevgera Jinên Azad (TJA), Partiya Herêmên Demokratîk (DBP) û Partiya Wekhevî û Demokrasiyê (DEM Partî) ya Riha û navçeyên Riha, Komeleya  Rojnamegerên Jin a Mezopotamyayê (MKG) û Komeleya Rojnamegeran a Dîcle Firatê (DFG) ji bo rojnameger Cîhan Bîlgîn û Nazim Daştan ku li Bakur û Rojhilatê Sûriyeyê di 19'ê Kanûnê de hatin qetilkirin li Rihayê daxuyanî dan. 

 

Di daxuyaniyê de pankartên bi wêneyên rojnamegerên hatin qetilkirin û hejmara îro ya rojnameya Yenî Yaşam hatin hilgirtin. Rojnameger Emrullah Acar metna çapemeniyê ya bi kurdî, Aktivîsta TJA’yê Edle Fîdan jî ya tirkî xwend.

 

Di daxuyaniyê de hat diyarkirin bi dehan sal e Çapemeniya Azad li Kurdistanê, li Rojhilata Navîn û li hemû cîhanê ji bo ragihandina heqîqetê dixebite, di nava şert û mercên herî dijwar de xwest rastiyan ji raya giştî re ragihîne, hemû metirsî û talûke hilgirtiye ser xwe û hê jî vê lêgerînê didomîne. Berdewamiya daxuyaniyê wiha ye: " Di vê lêgerînê de gelek hevalên me hatin qetilkirin û gelek jî hatin girtin. Lê ev têkoşîn tu carî ranewestiya.

 

Zêdeyî 40 sal in tevî êrişên endam, kontra û çeteyan JÎTEM'ê jî dev ji ragihandina heqîqetê berneda. Dema ku DAIŞ’ê li gelek deverên Rojhilata Navîn hovîtî pêk anî, herî zêde xebatkarên Çapemeniya Azad rastî ragihandin. DAIŞ’ê ji bo ku rastî neyê bihîstin di hedef û qetilkirina rojnamegeran de dudilî nebû. Denîz û Nûjiyan bûn pêşengên vê têkoşînê. Kiryarên hovane yên DAIŞ'ê yên li Şengal, Kobanê û Reqayê ji cîhanê re ragihandin. Li ser hesabê canê xwe dev ji ragihandina heqîqetê bernedan. 

 

ROJNAMEGER DI HEDEFÊ DE NE

 

Yên ku herî zêde dibin hedefa şer bê şik rojnameger in. Do em hîn bûn ku 2 hevalên me yên rojnameger hatine qetilkirin. Dema DAIŞ’ê êrîşî Kobanê dikir, her du hevalên me bi rojan li pey nûçeyan bûn. Azadiya Kobanê ji cîhanê re ragihandin. Nazim Daştan ji roja destpêkê heta roja dawî hem bû şahid û hem jî bû dengê berxwedana Kobanê. Cîhan Bîlgîn ji roja destpêkê heta roja dawî ya pêngava rizgarkirina Reqa ku veguherî navenda hovîtiya DAIŞ'ê, bû dengê jinên dîlgirtî û bi hesreta azadiyê. Bi kamera û nîşeyên xwe, cîhê ku tarî lê hebû ji bo ronî bike li berxwe da. Lê mixabin kesên bû sedem DAIŞ êrişî Kobanê bike, kesên ku baxçeyê paşiyê yê DAIŞ'ê bûn, dema DAIŞ têk çû îro di bin navên cuda de dîsa amadekariya êrişa li ser Kobanê dikin. Nazim û Cîhan ji ber ku ev rastî ji cîhanê re ragihandin bûn hedef.

 

LI SÛRIYEYÊ PLANÊN QIRÊJ

 

Li Sûriyeyê planên qirêj dixin meriyetê. Bi taybet Kobanê ya ku li cîhanê bûye sembola têkoşîna azadiyê tê xwestin bê tunekirin. Lê belê Tirkiye dibêje kû ti pirsgirêka wan bi Kurdan re nîne. Heke bi rastî tu pirsgirêk tune be, wê demê Nazim û Cîhan çima hatin qetilkirin? Yên ku tenê xema wan jiholêrakirina destkeftiyên Kurdan e, yên ku tenê kamerayên wan hene bi balafiran bombe dikin.

 

Ji aliyekî ve yên ku dibêjin demokrasî û aştî, li aliyê din jî ji bo gelê Kurd azad nejî, her cure êrîşan amade dikin. Yên ku wek şandeyên demokrasiyê tên hesibandin, dema ku mijar dibe Kurd xwe ji şerê herî qirêj dûr naxin. Dema ev rastî derdikevin holê rojnamegeran qetil dikin. Dema planên wan ên qirêj eşkere dibin, bi awayekî hovane êriş dikin. Li şûna ku dev ji planên xwe yên qirêj berd in, sûc dixin stûyê rojnamegeran. Lêbelê, berpirsiyariyên esas ên van planan çêdikêne.

 

XWESTIN HEQÎQETÊ RAGIHÎNIN

 

Nazim û Cîhanê xwestin bi xwe biçin qadên şer û raya giştî ji rewşê agahdar bikin. Her du hevalên me ne tenê planên qirêj eşkere kirin, derewên çapemeniya şerê taybet jî eşkere kirin.

 

Cîhan Bîlgîn geşedanên dawî yên Bendava Tişrînê ya ku bi rojan e di bin êrişan de ye ji cîhanê re ragihand. Ji bo ku zîhniyeta medyaya alîgir a ku rastiyan vedişêre derxe holê û raya giştî ji nedîtî ve nehêle, tevî hemû talûkeyan xebatên xwe berdewam kir. 

Her tim bûne dengê heqîqetê. Heta kêliyên xwe yên dawî bûn dengê Rojava. Çi dibe bila bibe em ê kamera û pênûsên wan li erdê nehêlin. Em ê tu carî dev ji ragihandina rastiyê bernedin. Çapemeniya Azad wê ragihandina rastiyan bidomîne. Çapemeniya Azad heta ku bigihêje armancên xwe wê di vê rêyê de bimeşe."

 

Daxuyanî bi dirûşman bi dawî bû.