STENBOL - Hevberdevkê HDK’ê Cengîz Çîçek di “Komxebeta Tenduristiya Girtîgehan a Navneteweyî” de axivî û got: “Binpêkirinên mafan ên li girtîgehan tene ne bêhiqûqî ye, di heman deme de gefê li selametiya civakê jî dixwe. Divê tevgera mirovahiya mezin bi hêz bibe.”
Meclisa Tenduristiyê ya Kongreya Demokratîk a Gelan (HDK) ji bo balê bikişîne ser rewşa girtiyên siyasî yên li girtîgehan bi taybet Girtîgeha Îmraliyê, "Komxebata Tenduristiya Girtîgehan a Navneteweyî" li dar xist. Nûnerên saziyên tenduristiyê yên navneteweyî, rêxistinên mafên mirovan, rêxistinên girseyî yên demokratîk û partiyên siyasî beşdarî komxebatê bûn. Komxebeta li otelek li Stenbolê hat lidarxistin.
Hevberdevkê HDK’ê û Parlamenterê DEM Partiyê Cengîz Çîçek di destpêkirina komxebatê de axivî û diyar kir ku binpêkirinên mafan ên li girtîgehên li dijî girtiyên siyasî bi armanca têkbirina têkoşîna civakê ye. Çîçek got: “Di encamê de em di nava civakê de dijîn û girtîgeh jî bi rêgezên hiqûqî ve girêdayî ne. Dewlet sîstemên xwe yên hiqûqî li gorî berjewendiyên xwe birêkûpêk dikin û polîtîkayên girtîgehê jî di vê çarçoveyê de tên teşekirin. Ji ber vê yekê girîng e ku li girtîgehan bi têkoşînên civakî re bên nîqaşkirin. Li Tirkiye û Kurdistanê bi hezaran kes li dijî şêwaza jiyanê ya ji aliyê sîstemê ve hatiye ferzkirin li ber xwe didin. Bi taybetî gel, jin û komên din ên civakî bi awayekî cidî li dijî vê pergalê têdikoşin. Zindan ne tenê cihên ku mirov lê tên ragirtin, di heman demê de bandorê li ser selametî-tenduristî û mafên civakê jî dike. Ji vê perspektîfê diyar e ku divê girtîgeh bi giştî bi tenduristiya giştî ya civakê re bên nirxandin.”
‘HELWESTEK DIJMINANE YE’
Çîçek qetilkirina girtiyê nexweş Abdulkadîr Kuday ê li Girtîgeha Metrîsê jiyana xwe ji dest da bi bîr xist û got: “Tevî serî li Wezareta Dadê û saziyên pêwendîdar hat xistin jî nehat berdan. Dewlet li dijî mafên mirovan û şexsan hiqûqa dijminatiyê nîşan dide. Ev tene ne bêhiqûqî ye di heman demê de gefê jî li selametiya civakê dixwe.”
‘NE MIMKÛN E KU KES XWE BIGIHÎNE OCALAN’
Çîçek bal kişand ser rewşa Abdullah Ocalan ê ku li Girtîgeha Tîpa F ya Ewlekariya Bilind a Îmraliyê di bin tecrîdê de tê girtin û 43 meh in agahî jê nayê girtin û wiha got: "Xwegihandina rêberê gelê kurd Abdullah Ocalan ne mimkûn e. Rewşa wî tenê ne pirsgirêkek hiqûqî ye di heman demê de meselek ku tenduristiyê derbas kiriyeye jî. Di vê pêvajoya ku Ocalan weke rêber hate qebûlkirin de, destwerdana feraseta jiyana demokratîk, wekhevî û yekitiya bi rûmet a ku wî ava kir, hate kirin. Lê di vê qonaxa ku em gihîştinê de, di têkoşîna ne tenê mafên hiqûqî, di heman demê de ji bo mafên çandî jî barekî mezin derketiye holê. Dema em koçberî, pêvajoyên pevçûnan û kesên jiyana xwe ji dest didin dinirxînin, her yek ji van mijaran ji bo bi mîlyonan kurdan aciziyên giran peyda kirine. Pirsgirêka Kurdistanê di heman demê de pirsgirêka Rojhilata Navîn e. Di heman demê de pirsgirêka Kurdistanê parçayek têkoşîna wekheviyê û edaletê ya Rojhilata Navîn e.”
Piştî axaftina Çîçek, komxebat ji çapemeniyê re girtî berdewam kir.