COLEMÊRG - 26 jinên ku li navçeya Geverê wêneyên wan bi awayekî bê destûr li ser hesabên medyaya dîjîtal, hatine parvekirin û hatine tacîzkirin, serî li ÎHD’ê dan.
Li navçeya Gevera Colemêrgê bi wêneyên 26 jinan li ser medyaya dîjîtal hesabên sexte hatin vekirin. Kesên ku ev hesab vekirine, peyamên gef û tacîzê ji hesabên jinan ên rast re şandin. Ji 26 jinan hinekan çûn Şaxa Komeleya Mafên Mirovan (ÎHD) a Colemêrgê û ji bo têkildarî bûyerê pêvajoya hiqûqî were destpêkirin, serî lê dan.
Endama Lijneya Rêveberiya ÎHD’ê Pinar Şen têkildarî bûyerê daxuyanî dan. Şen, bi lêv kir ku li Colemêrg û navçeyên wê jin hedef tên girtin û mafên wan ên jiyana taybet tên binpêkirin. Şen, da zanîn ku têkildarî bûyerê 2 jinan serî li wan dane û daxwaza alîkariya hiqûqî kirine û bi lêv kir ku li ser hesabên medya dîjîtal peyamên tacîz û gef xwarinê ji jinan re hatine şandin. Şen, diyar kir ku têkildarî jinên serî li komeleya wan dan de beriya niha jî li ser medya dîjîtal hesab hatine vekirin û wiha got: “Serlêderan diyar kirin ku herî dawî di 22’yê Çileya 2022’yan de li ser hesabên medya dîjîtal li ser navê wan hesabên li dijî exlakê hatine vekirin û li ser van hesaban bi awayekî bê destur wêneyên wan tên parve kirin. Serlêderan dan zanîn ku ji ber bûyera qewimî bi awayekî manewî gelek zirar dîtine û parvekirinan bandor li ser jiyana wan kirine.”
WÊNEYÊN 26 JINAN HATIN PARVEKIRIN
Şen, bi lêv kir ku wêneyên 26 jinan bi awayekî bêdestûr bi paşnavên wan ve hatine parverkirin û wiha berdewam kir: “Ev êrişeke mezine li dijî kesayet û rûmeta jinên li herêmê dijîn hatiye kirin. Têkildarî bûyerê wê parêzerên me pêvajoya hiqûqî bidin destpêkirin û ji bo bûyer were ronîkirin û faîlên sûc cezayê pêwîst bigirin wê bi hemû derfetên xwe bixebitin. Em ji raya giştî û çapemeniyê re radigihînin ku weke parazvanên mafên mirovan pêvajoya hiqûqî bidin destpêkirin û têbikoşin.”