STENBOL - Rêberê PKK’ê Abdullah Ocalan di nava şert û mercên giran ên tecrîdê de tê ragirtin û zêdetirî 27 meh in tu agahî jê nayên girtin. Hat zanîn ku ji bo hevdîtina bi Abdullah Ocalan re biryareke din a qedexeya hevdîtinê ya bi malbat û parêzeran re hatiye dayîn.
Rêberê PKK’ê Abdullah Ocalan bi Komploya Navneteweyî ya 15’ê Sibatê re hate girtin û ji sala 1999’an heta niha li Girtîgeha Tîpa F a bi Ewlekariya Bilind a Îmraliyê di nava şert û mercên giran ên tecrîdê de tê ragirtin. Birayê Ocalan, Mehmet Ocalan di 25’ê adara 2021’an de li ser telefonê bi birayê xwe re axivî bû lê telefon hatibû qutkirin. Ji wê rojê ve jî tu agahî ji Abdullah Ocalan nayên girtin. Parêzerên Bûroya Hiqûqê ya Sedsalê ji bo hevdîtina bi muwekîlê xwe re gelek caran serlêdan kirin lê ev serlêdan yan bêbersiv hatin hiştin an jî bi hinceta “cezayê disiplînê” hatin redkirin.
JI BO ÎTÎRAZÊ REDA BÊHINCET
Li dijî qedexeya hevdîtina bi malbatê re parêzeran herî dawî di 23’yê kanûna 2022’yan de serî li 2’yemîn Dadgeriya Înfazê ya Bursayê dan. Serlêdana parêzeran bi hinceta biryara qedexeya hevdîtina bi malbatê re ya ji bo 3 mehan hate redkirin. Têkildarî naveroka biryara redkirinê tu agahî bi parêzeran re nehatin parvekirin. Tenê hat gotin ku “cezayê disiplînê” heye. Parêzeran ji bo rakirina biryarê di 10’ê çileyê de serlêdana îtîrazê ji bo 1’emîn Dadgeha Cezayên Giran a Bursayê kirin. Dadgehê di heman rojê de bi heman hincetê îtîraza parêzeran red kir.
QEDEXEYA HEVDÎTINA BI MALBATÊ RE YA NÛ
Parêzeren piştî erdheja 6’ê Sibatê ya Mereşê ku bandoreke mezin li gelek bajaran kir, ji bo hevdîtina parêzer û malbatan careke din serlêdan kir. Parêzer hîn bûn ku di 21’ê kanûna 2022’yan de ji bo 3 mehan derheqê Rêberê PKK’ê Abdullah Ocalan û muwekîlên wan ên din Omer Hayrî Konar, Hamîlî Yildirim û Veysî Aktaş de biryara qedexeya hevdîtina bi ziyaretvanan de hatiye dayîn û biryara qedexeyê di 10’ê çileya 2023’yan de teqez bûye. Parêzeran tevî vê yekê jî ji bo hevdîtina parêzeran hefteyê du caran û ji bo hevdîtina bi malbatan re jî hefteyê carekê serlêdan kirin.
Parêzeran di 6’ê nîsana 2023’yan de cuda cuda ji bo Serdozgeriya Komarê ya Bursayê û Girtîgeha Tîpa F a bi Ewlekariya Bilind a Îmraliyê serlêdan kirin. Serlêdan hewaleyî 1’emîn Dadgeriya Înfazê ya Bursayê hatin kirin û dadgeriyê di 12’ê nîsanê de serlêdana ji bo hevdîtinê û îtîrazên parêzeran red kir. Li gel ku biryara qedexeyê ya berê hêjta ne qediya bû jî dadgeriyê destnîşan kir ku di 15’ê adarê de ji bo qedexeya hevdîtina bi ziyaretvanan a li Girtîgeha Tîpa F a bi Ewlekariya Bilind a Îmraliyê re biryareke din dane, biryar di 30’ê adarê de teqez bûye û bi vê sedemê jî serlêdana ji bo hevdîtinê red kiriye.
Parêzeran, di 14’ê nîsanê de ev biryar bi 1’emîn Dadgeha Cezayên Giran a Bursayê. Dadgehê îtîraza parêzeran di 30’ê nîsanê de red kir û biryar teqez bû. Bi vê yekê re derheqê Rêberê PKK’ê Abdullah de biryareke nû ya hevdîtina qedexeya bi malbatê re hate dayîn.
QEDEXEYA HEVDÎTINA BI PARÊZERAN RE YA NÛ
Her wiha tevî ku biryara qedexeya hevdîtina bi parêzeran re ku di 27’ê cotmeha 2022’yan de teqez bûbû bi dawî bû jî, ne dozgeriyê û ne jî rêveberiya girtîgehê tu bersiv nedidan serlêdanan.
Parêzeran ji bo hevdîtinê bi parêzeran re di 27’ê nîsana 2023’yan de serî li Dadgeriya Înfazê ya Bursayê dan. Lê belê dadgeriyê bersiv neda serlêdanê. Li şûna dadgeriyê, 1’emîn Dadgeha Cezayên Giran a Bursayê teblîg ji parêzeran re şand. Di teblîgê de cih da biryara 3’yemîn Dadgeha Cezayan a Bursayê. Di biryara teblîgê de hat destnîşankirin ku ji bo Rêberê PKK’ê Abdullah Ocalan biryareke nû ya qedexeya hevdîtinê ya ji bo 6 mehan hatiye dayîn.
Hat zanîn ku parêzeran li dijî biryarên qedexeyê li Dadgeha Destûra Bingehîn (AYM) serlêdanên şexsî kirine.
MA / Mehmet Aslan