NAVENDA NÛÇEYAN - TAJÊ bi daxuyaniyekê bêdengiya raya giştî ya navneteweyî û OPCW li dijî êrişên bi çekên kîmyewî yên Tirkiyeyê şermezar kir û bang li jinên êzidî û gelê azadîxwaz kir ku li ber êrişan rabin.
Tevgera Azadiya Jinên Êzidî (TAJÊ), têkildarî bikaranîna çekên kîmyewî ya Tirkiyeyê ya li dijî gerîlayên PKK’ê daxuyaniyek nivîska da.
Di daxuyaniyê de hat diyarkirin ku dewleta Tirk û hevkarê wê PDK ji meha Nîsanê heya niha bênavber erişên hovane li ser gerîlayan dide meşandin û wiha hat gotin: “Ji bo tunekirina gerîlayên azadiyê hemû teknîk, artêş û çete yên xwe xistiye tevgerê. Berxwedana gerîla ya heyî êrişên dijmin vala têk biriye. Ji ber ku dewleta Tirk li hemberî vîna gerîla li bin ketiye, ji bo vê jî şerekî derveyî exlaqê mirovatiyê dimeşîne û bi çekê kîmyewî êrişî çeperê gerîla dike. Beramberî bikaranîna çekên kîmyewî yê dewleta Tirk li qada navneteweyî bêdengiyek heye. Tevî ku zanin ev yek li derveyî pîvanên şer e jî beramberî dewleta Tirk ti helwest nayê danîn.”
TAJÊ’yê di daxuyaniya xwe de bêdengiya li qada navneteweyî û saziya OPCW şermezar kir û wiha got: "Êrişa ku ji aliyê DAIŞ’ê ve 3’yê Tebaxa 2014’an de li ser civaka me hate kirin hemû cîhan xwe jê re ker kiribû. Êriş herî zêde li hemberî jinan hatibû kirin û ji ber wê jî ya herî zêde êş kişandî jin bû. Di rewşeke bi wî rengî de gerîlayên azadiya Kurdistan bi hawara civaka Êzîdî ve hatin. Ji bo xilaskirina Şengalê ya ji destê DAÎŞ’ê gerîlayên azadiyê û PKK’ê bêhesab berxwedanek mezin meşand. Di encama vê berxwedanê de axa Êzidxana pîroz ji destê çeteyên DAÎŞ’ê hate rizgarkirin. Îro jî ev gerîla yên ku em ji destê DAÎŞ’ê rizgar kirin li beramberî wan êrişeke pir dijwar ji aliyê dewleta Tirk û PDK’ê ve tê kirin. Tenê van rojên dawî 17 gerîlayên azadiyê bi çekên qedexe yên kîmyewî hatin qetilkirin.
Li hemberî van êrişan bêdengiya li qada navneteweyî û OPCW ( Rêxistina Qedexekirina Çekên Kîmyewî) em şermezar dikin. Bêdengiya heyî diyar dike ku hevkariyek heye û dixwazin têkoşîna azadiya gelan tune bikin. Em zanin yê ku îro êrişî gerîla dikin û yên ku di 3’yê Tebaxa 2014’an de ji bo koka civaka Êzidî tune bike ferman li ser me rakirin heman hêz bûn. Di heman demê de yên wê demê û niha bêdeng in jî heman hêz in.
"Em wek Tevgera Azadiya Jinên Êzidî (TAJÊ) li hemberî êrişên ku li ser Gerîlayên azadiya Kurdistanê tên meşandin rawestin. Heya ku Dewleta Tirk û PDK têk biçe em ê di nav tekoşîneke bêhempa de bin. Daxwaza me ji hemû jinên Êzîdî û gelê azadîxwaz ew e ku li hemberî van êrişan li gel gerîlayên azadiyê cih bigrin."