Hevserokê Giştî yê Komeleya Elewiyên Demokratîk (DAD) Mûsa Kûlû, çalakiyên greva birçîbûnê yên girtiyan ên li dijî tecrîda li ser Rêberê PKK'ê Abdullah Ocalan û operasyonên Tirkiyeyê yên derveyî sînor nirxandin. 

 

TUNEHESIBANDIN

 

Kûlû, anî ziman ku Komar li ser tunehesibandina kurd û eleiyan hatiye avakirin û îqtidarên Tirkiyeyê her tim kurd û elewî tune hesibandine û wekî dijmian nêzî wan bûne. Kûlû, destnîşan kir ku niha jî AKP-MHP kurd û elewiyan "kiriye şeytan" û got: "Îqtidara niha ji heqîqetê direve û van pêkanînan dixe dewrê. Lê belê ev yek prisgirêkan çareser nake, bereksê wê pirsgirêkên nû diafirîne." 

 

HIQÛQ

 

Kûlû, bal kişand ser rewşa girtiyên siyasî jî û destnîşan kir ku divê dewlet dev ji polîtîkayên xwe yên tunekirin û înkarê yên li hemberî girtiyan berde. Kûlû, bal kişand ser çalakiyên grevên birçîbûnê yên li girtîgehan ku li dijî tecrîda li ser Rêberê PKK'ê Abdullah Ocalan hatine destpêkirin û got: "Pergala Îmraliyê, pergaleke ku li tu devera cîhanê tune ye. Birêz Ocalan û girtiyên din hema bibêje nikarin mafekî xwe yê hiqûqî jî bi kar bînin. Girtî jî li hemberî vê bêhiqûqîtiyê bedena xwe dane ber birçîbûnê. Heger ev heqîqet neyê dîtin, dê bi tu awayî bi kêrî demokrasiya welêt neyê. Bereksê wê, dê xirabtir bike. Bil Tirkiye li gor hiqûqê tevbigere. Bi vî awayî dê piraniya pirsgirêkan ji holê rabe. Heger pêk neyê, dê pirsgirêk lareşî bibin." 

 

Kûlû, destnîşan kir ku ji bo demokrasî bê avakirin divê civak bi awayekî cidî dengê xwe bilind bike û got: "Heger em bertek nîşan nedin, em ê bi destê xwe pêşeroja xwe radestî pergalê bikin." 

 

Kûlû, got: "Civak hatiye tecrîdkirin. Mirov nikarin dakevin kuçeyan doza heqê xwe bikin. Welat bi temamî veguheriye girtîgehekê."

 

PLANÊN DI DEWRÊ DE 

 

Kûlû, ji bo operasyonên TSK'ê yên li Herêma Kurdistana Federe jî destnîşan kir ku Tirkiye dixwaze hêzên kurd bera hev du bide û Peymana QEsr-î Şîrînê bibîr xist ku ji bo perçekirina kurdan hatibû îmzekirin. Kûlû got: "Tirkiye ji berê de planên ku kurdan bera hev du bide çêdike. Ev plan, niha jî di dewrê de ne." 

 

Kûlû, pevçûnên ku di salên 90'î de di navbera PDK û PKK'ê de çêbûn bibîr xistin û got: "Di vî şerî de bedêlên pir giran hatin dayîn. Niha Tirkiye bi teknolojiya xwe li Herêma Kurdistana Federe şer dike. Divê her kes bi vê zanibe, gava dagirker biçin herêmekê qethiyen tiştekî ji gelê wir re nahêlin. Ji bo wan êsîr bikin diçin wir. Şer û mirinên li Başûrê Kurdistanê, dê daxwaza kurdan a ji bo azadiyê û pirsgirêka wan a hebûniyê bide ber nîqaşê. Lewma divê tu kurdekî xwedî wijdan, xwedî ehlaq û bîbir li ber birakujiya li wir xwe li guhnedêriyê daneyne." 

 

Kûlû, anî ziman ku ereb, faris û tirkên sondxwarî ji bo kurd nebin xwedî tiştekî her tiştî dikin û dixwazin kurdan bera hev bidin û bi vî awayî wan qels bikin. 

 

DIYALOG

 

Kûlû, destnîşan kir ku pirsgirêka kurd dê ne bi şer, bi diyalogê çareser bibe û got: "Her şerek, xwedî rûxandinek aborî ye. Dê di pêşerojê de fatûreya wê giran be. Li gor baweriya me, heger kesek canekî bikuje, em wî/ê kesê daxilî cemê nakin. Li ku dera cîhan dibe bila bibe, gava nasnameya civakekê tune bê hesibandin, em li ber vê radibin. Em tim li cem mazlûm û mexdûran e. Heger welatek qesda tunekirina civakekê bike, ew welat amadekariyên rûxandina xwe dike." 

 

MA / Mehmet Şah Orûç