Jinan li Ofîsê Zincîra Xemrî ava kir: Jin Jîyan Azadî 

2020-05-16 15:32:38


	 

	AMED - Gelek endam, rêveber û nûnerên rêxistinên jinan di peşengiya TJA’yê de li Ofîsa Amedê kom bûn û li dijî tundiyê qêrîyan. Jinên ku rêz bûn û Zincîra Xemrî ava kirin gotin: "Jin jiyan azadî" û tundiya li dijî jin û zarokan şermezar kirin. 

	 

	Nûner, endam û rêveberên gelek rêxistinên jinan di pêşengtiya Tevgera Jinên Azad (TJA) de li Semta Ofîsê kom bûn û êrîş û tindiya li dijî jin û zarokan şermezar kirin. Jin, ofîsê kom bûn û xwestin li pêş Otela Prestijê daxuyaniyê bidin çapemeniyê. Lê polîsan li pêş jinan barîkat danîn. Jinan bertek nîşanî helwesta polîsan dan û dirûşma "Jin, Jiyan, Azadî" berz kirin. Jinan li ser astengiya polîsan bi dirûşmeyan meşiyan Xaçerêya Ofîsê û li vir Zinrcîra Mor ava kirin. Jinan di çalakiyê de dowîzên "Jin jiyane Jiyanê Nekuje", "Dest Nede Vîna Min", "Gulistan Dokû li kû ye", "Jin Bi Hevre Xurtin" rakirin û daxuyanî dan. Kesên li derdorê bi çepikan piştgirî dan çalakiyê. Parlementerên HDP’ê, aktîvîstên TJA’yê û nûnerên rêxistinên jinan amade bûn. Li vir Seroka Komeleya Rosayê Adalet Kaya û Berdevka TJA’yê Ayşe Gokkan axivîn. 

	 

	'TUNDIYA LI DIJÎ JINÊ ZÊDETIR BÛYE' 

	 

	Ewil Seroka Komeleya Jinê ya Rosayê Adalet Kaya pirsa "Zêde şewba vîrusê mirov dikuje an tundiya mêr a nava malê jinê dikuje? pirsî û got: “Di vê pêvajoyê de li Tirkiyê û li her derê cîhanê kuştina jinan û tundiya li ser jinê zêdetir bûye. Em li ser bernameyên onlinê bi saziyên jinan re dixwazin dengê xwe derxînin û bang li dewletê dikin ku tedbîran zêdetir bigirin”

	 

	‘HEVSEROKATÎ MAFÊ ME YE' 

	 

	Kaya, bal kişand ser qanûna înfazê ya rêya verdana tecawîzkaran vekir û wiha axivî: “Em dixwazin ev qanûna li dijî hiqûqê betal bibe û qanûn ji nûve bê sazkirin. Kesên ku bi qanûnê hatine berdan her roj zirarê didin jin û zarokan. Ev ne bes e êrîşî hemû destkeftiyên me dikin. Em li dijî tayînkirina qeyûm in. Pergala Hevserokatiyê û destkeftiyên jinan mafên me ne. Em ê li dijî van sepanên li ser nirxên jinê têbikoşin.”

	 

	‘BI RÊBAZA DAÎŞÊ ÊRÎŞÎ JINAN DIKIN'

	 

	Berdevka TJA’yê Ayşe Gokkan jî bal kişand ser êrîşên ku li ser jinan û zarokan tên meşandin û wiha got: "Ev êrîş sûcên mirovahiyê ne. Em êrîşa li ser jinan rûreşiya pergala dewleta AKP’ê û MHP’ê dibînin. Neyartiya jinê, jinê bi mêr dide kuştin. Bi rêbaza DAÎŞ’ê êrîşî jinan dikin. Em wek TJA bangê li hemû berpirsyaran dikin ku qetlîama jinê rureşî ye û mora reşe li eniya dewletê ye. Heke bixwazin xwe ji vê mora reş xelas bikin, bila demildest hemû hevşaredar, siyasetmedar û aktîvîstên siyasî yên ji bo demokrasiyê li berxwe didin  serbest berdin. Kesên edalet, aşitî û wekheviyê dixwazin di zindanan de ne. Lê tecawîzkar û çete hatin berdan. Hûn hemû şahid in ku me gav paşve neavêt û em ê neavêjin.”

	 

	Daxuyanî bi dirûşma "Jin, Jiyan, Azadî" bi dawî bû.