Jinan bi boneya 8'ê Adarê kart ji girtiyan re şandin 

2019-03-01 14:44:08


	 

	COLEMÊRG / WAN - Di çarçoveya şahiyên 8'ê Adarê Roja Jinan a Cîhanê de li Colemêrgê ji jinên girtî re kart hat şandin. Li Wanê jî TJA'yê bernameya 8'ê Adarê eşkere kir. 

	 

	Meclîsa Jinan a HDP'ê ya Colemêrgê bi wesîleya 8'ê Adarê Roja Jinan a Cîhanê ji jinên girtî re kartan şandin. Li Wanê jî Tevgera Jinên Azad (TJA) û Meclîsa Jinan a HDP'ê bernameya 8 rojan eşkere kir. 

	 

	‘BI ÎRADEYA LEYLAYAN EM Ê BÊJIN RAWEST E'

	 

	Namzeta HDP'ê ya Hevşaredariya Colemêrgê Seher Kadîroglu Ataş jî di nav de jinên HDP'yî li avahiya HDP'a Colemêrgê kom bûn û beriya kartan ji jinên girtî re bişînin daxuyaniya çapemeniyê dan. Li ser navê jinan Zeynep Kaya axivî û got: "Em di serdemek şidet, cînayet, îstîsmar û feqîriya jinan di asta herî jor de ye derbas dibin. Em ê li dijî van binpêkirinên mafan bi îradeya Leylayan serî rakin û ji pêkanînên dijî jinê re bêjin raweste. Em ê bi tîlîliyên xwe 8'ê Adarê pêşwazî bikin."

	 

	Piştî daxuyaniyê jin çûn avahiya postaxaneyê û jinên girtî re kartan şandin. 

	 

	JINÊN WANÊ BERNAMEYA XWE EŞKERE KIRIN 

	 

	TJA û Meclîsa Jinan a HDP'a Wanê jî bernameya şahî û çalakiyên 8'ê Adarê bi civînek çapemeniyê eşkere kir. Gelek jin beşdarî civînê bûn. Rêvebera DBP'a Wanê Berken Kizilboga daxuyanî da û bernameyê eşkere kir. 

	 

	Bernameya jjinan a li Wanê wiha ye: 

	 

	* 2'ê adarê li Erdîşê hevdîtina bi jinan re 

	 

	* 2'ê adarê li Westanê bi jinan re hevdîtin 

	 

	* 3'ê adarê li Elbakê bi jinan re hevdîtin 

	 

	* 3'ê adarê li Ebexê (Çaldêran) hevdîtina bi jinan re 

	 

	* 4'ê adarê li Payîzava, Serayê, Qelqelî û Bêgirê bi jinan re hevdîtin 

	 

	* 6'ê adarê bi beşdariya Hevseroka Giştî ya HDP'ê Pervîn Buldan li Kolana Cumhuriyetê vekirina buroya hilbijartinê  

	 

	* 7'ê adarê rapora qeyûman a jinan dê bê eşkerekirin  

	 

	* 8'ê adarê bi beşdariyê Hevseroka Giştî ya HDP'ê Pervîn Buldan mitînga 8'ê Adarê