Li Wanê bertek nîşanî mirinên jinan ên bi guman dan

2020-06-13 16:51:43


	WAN - Meclîsa Jinan a HDP û aktivîstên TJA'yê, li Wanê bertek nîşanî mirinên jinan ên bi guman yên li Agiriyê rû didin dan. Parlamentera HDP'ê ya Agiriyê Dîlan Dîrayet Taşdemîr, diyar kir ku li dijî tundiya zilam tişta bê kirin piştevanî û têkoşîna jinê ye.

	Meclîsa jinan a Partiya Demokratîk a Gelan (HDP) û Tevgera Jinên Azad (TJA), têkildarî mirinên bi guman ên jinan ên ku di demên dawî de li Agiriyê zêde bûne li Wanê daxuyanî dan çapemeniyê. Parlamentera HDP'ê ya Agiriyê Dîlan Dîrayet Taşdemir, Parlamentera HDP'ê ya Wanê Muazzez Orhan, û gelek jin beşdarî daxuyaniya li avahiya partiyê hat dayin, bûn. Dowizên bi nivîsên “Jin Jiyane Jiyanê Nekuje”, “Bijî Yekitiya Jinan” û wêneyên jinên hatibûn qetilkirin û jinên bi awayekî bi guman jiyana xwe ji dest dabûn, li ser bûn, hatin hildan. Di heman demê de pankarta bi nivîsa "Jin jiyan azadî" hat hilgirtin. 

	 

	'MÎNA ÎNTÎHARÊ DERBASÎ QEYDAN DIKIN'

	 

	Li ser navê Meclîsa Jinan Dîlan Dirayet Taşdemîr daxuyanî da. Dilanê da zanîn ku cinayetên jinan hatiye asteke bilind û wiha got: "Yek jê ji cihên ku jin tên kuştin, Agirî ye. Di meha dawî de 5 jin hatin qetilkirin. Mirinên bi guman wekî 'întixar' derbasî qeydan bûn. Lê em dizanin ku ev mirinên bi guman in."

	 

	'JINAN BER BI ÎNTIHARÊ VE DIBIN'

	 

	Taşdemîr, bi bîr xist ku li Agiriyê di 35 rojên dawî de 5 jinî jiyana xwe ji dest dane û wiha dewam kir: "Li tirkiye û Kurdistanê gelek mînakên ku jinê ber bi întiharê û kuştinê ve dibe heye. Gelek mînakên ku jin tên qetilkirin û wekî întiharê derbasî qeydan dibe em dibînin. Ji kuştina jinan AKP a ku polîtikayên dijminatiya jinê dimeşîne jî berpirs e."

	 

	'AKP 18 SALIN BINGEHA TUNDIYA LI DIJÎ JINÊ AVA DIKE'

	 

	Taşdemîr, anî ziman ku kuştina jinan ne tesaduf e û wiha dewam kir: "Cinayetên jinan polîtîk e. Agirê ji bajarên herî xizan e. Qada îstihdama jinan gelekî kêm e. Îktidara 18 salî ya AKP'ê êrîşî destkeftiyên jinan dike. Saziyên jinan digire û bingehê ji tundiyê re ava dike. Îktidara 18 salî ya AKP'ê bingeha tundiya li dijî jinê ava kir."

	 

	'KUŞTINÊN JINAN POLÎTÎKIN'

	 

	Taşdemîr, herî dawî bang li jinan kir û wiha got: "Em ji hemû jinan re dibêjin 'Hûn ne bi tenê ne'. Ji bo piştevaniya we meclîsên me yên jinan û TJA heye. Ji bo çareserkirina pirsgirêkên we bi me re di nava têkiliyê de bin. Em ê dirûşma "Têkoşîna jinê li her derê ye" her dem têxin meriyetê. Têkoşîna jinê dide jiyîn."

	 

	Daxuyanî bi dirûşmên "Cinayetên jinan polîtîk e","Jin jiyan azadî" bi dawî bû.