
Karkerên ku di înşaeta mizgefta qaçax de birîndar bûn pere pêşniyazî wan hatiye kirin

2022-12-13 09:07:20


	ÊLIH - Ji bo 24 karkerên ku di înşeata mizgeftê de birîndar bûbûn, dest ji giliya xwe berdin 4 qatê meaşê kêm pêşniyazî wan hat kirin. Kifş bûbû ku mizgefta navborî bi awayekî qaçax tê çêkirin û ji ber vê ketibû ber lêpirsînê. Lê çendî ku pêvajoya darazî didome jî, çêkirina mizgeftê bi daxwaza Erdogan didome.

	&nbsp;

	Li Taxa Gultepeyê ya Êlihê, di 25'ê Mijdarê de îskeleya înşeata "kulliyeya" ku tê de mizgeft, baxçeyê gel, qadên bazirganî û teknîkê tên çêkirin, rûxiyabû. Ji ber vê 2 karkeran jiyana xwe ji dest dabûn û 24 karker jî birîndar bûbûn. Karkerên birîndar li Nexxweşxaneya Perwerdehî û Lêkolînê ya Êlihê tên dermankirin.&nbsp;

	&nbsp;

	DAXWAZA JI BO VEKOLANDINÊ HAT REDKIRIN

	&nbsp;

	Tevî îtirazên Desteya Koordînasyona Bajêr a Yekîtiya Odeyên Endezyar û Mîmaran a Tirk (TMMOB) jî, ji bo bigihê hilbijartinê çêkirina mizgeftê hatiye lezandin. Piştî li qada înşaeta mizgeftê karker jiyana xwe ji dest dan û birîndar bûn, TMMOB'ê xwest li qadê lêkolînê bike, lê daxwaza wê bi hinceta "ewlehiyê" hat redkirin. Piştî mirina karkeran Serdozgeriya Komarê ya Êlihê lêpirsîn da destpêkirin.&nbsp;

	&nbsp;

	Di çarçoveya lêpirsînê de îfadeya 4 kesên şeftiya şantiyeyê dikin hat girtin. &nbsp;Her wiha înşaeta li hundirê mizgeftê sekinandiye, lê sererastkirina derdora wê didome.&nbsp;

	&nbsp;

	PERE PÊŞNIYAZÎ KARKERÊN BIRÎNDAR HAT KIRIN

	&nbsp;

	Hat hînkirin ku karkerên di înşeata mizgeftê de dixebitin gelek caran kêmasî ragihandine rêveberiya şîrketê. Hat ragihandin ku piştî ku 2 karkeran jiyana xwe ji dest dane û 24 karker jî birîndar bûne, rêveberên şîrketê pêwendî bi karkerên birîndar û malbatên wan re danîne û dixwazin ser bûyerê binixumînin.&nbsp;

	&nbsp;

	Hat diyarkirin ku rêveberên şîrketa Fernasê ya malbata Necat Nasiroglû ku mizgeft li ser navê wî tê çêkirin, li nexweşxaneyê serdana karkerên birîndar kirine û ji bo karker dest ji giliya xwe berdin 4-5 qatê mûçeya kêmane pêşniyazî wan kirine. Malbatên ku haya ajansa me bi vê yekê xistin, gotin ku wan pêşniyaza şîrketê qebûl nekirine û dê dest ji giliya xwe bernedin.&nbsp;

	&nbsp;

	MA / Fethî Balaman&nbsp;

	&nbsp;

	&nbsp;