
Di 5 salan de 58 penêrfiroşan dikanên xwe girtin

2020-10-05 09:00:55


	AMED – Li Sûka Penêrfiroşan a navçeya Sûrê di 5 salên dawîn de 58 penêrfiroşan dikanên xwe girtine. Penêrfiroşan, destnîşan kir ku bi qrîza aborî û pandemiyê re karê wan hatiye asta rawestandinê û gotin ku tehma sûkê nemaye.

	Li Amedê, ji ber qrîza aborî her roj dikanên nû li dikanên ku tên girtin zêde dibin. Li gorî daneyên Yekitiya Odeyên Pîşekar û Esnafan a Amedê, di 6 mehên destpêkê yên sala 2019’an de li bajar 912 dikan hatine girtin. Dîsa ji 6 mehên dawîn ên heman salê û heta niha 890 dikanên din jî hatine girtin.&nbsp;

	&nbsp;

	Herî zêde jî dikan li Sûka Penêrfiroşan a li navçeya dîrokî Sûrê hatine girtin. Sûka ku berê 84 dikan lê hebûn, di 5 salên dawîn de ji ber qrîza aborî, qedexeyên derketina derve û pandemiyê 58 dikan lê hatine girtin tenê mane 26 dikan.

	&nbsp;

	JI HER DERA WELAT RE PENIR DIŞÎNIN

	&nbsp;

	Esnaf Lokman Yaşar ku 20 sal in li sûkê penir difiroşe, diyar kir ku bi qedexeyên derketina derve yên sala 2015’ân re girtinan dikanan dest pê kiriye û wiha gotg: “Bi kûrbûna qrîza aborî re girtina dikana zêde bû. Li gel ku demeke dirêj bihayê penir naguhere jî kes zêde nayê nakire. Penir ji gundên Farqîn, Çinar û Erxenê tê sûkê. Bihayê kiloya penir di navbera 20-35’an de diguhere. Em penirê li vir ji her dera welat re dişînin. Berhemên me xwezayî û xweş in.”

	&nbsp;

	TEMA SÛKÊ NEMAYE!

	&nbsp;

	Esnaf Besrî Yenîş jî ku ji kêmbûna karê wan gazinan dikir, da zanîn ku tema sûka penirfiroşan nameye û ev tişt anî ziman: “Ji bo debara xwe em vî karî didomînin. Li her cihê penir tê firotin, lê qalîteya penirê me cuda ye. Penirê li vir ne berhemê kargehê ye. Niha piraniya mirovan tenê kîlokî 2 kîlo dikirin. Berê em ji firotina penir nikaribûn bisekinin. Lê niha ji 2 saetan carekê ancax bikerek tê. Kar êdî nemaye.”

	&nbsp;

	BANDORA PANDEMIYÊ

	&nbsp;

	Esnafê bi navê Lokman Aydar jî, bi lêv kir ku bi destpêkirina pandemiyê re karê wan hatiye asta rawestandinê û wiha axivî: “Ji bo ku liv û tevgera li sûkê zêde bibe divê sûk bê sererastkirin. Sozên ku berê hatin dayîn bi cih nehatin. Dikan bûna mîna hêlinên çukan. Ji ber bûyeran nêzî 6 mehan dikan nehatin vekirin û heta salekê kes nehat dikanan. Xesara me ya van deman nehat bersivandin. Bi pandemiyê re karê me sekiniye. Hêza kirînê kêm bûye. Berê bikerekî ku bi 100 TL’yî 5 kîlo penir bikiriya niha dikare tenê 3 kîlo penir bikire. Her gav û saet zem çêdibin.”

	&nbsp;

	MA / Fethî Balaman – Ergîn Çaglar

	&nbsp;